TEFEO (Finidy NyAndry)

Aoka aho tsy ahalala ankoatran'ny manaiky
Na inona toa inona voasoritrao ho anjarako;
Aza avela akory haminany izay tsy haiko (aho) fa
Tefeo ahay hitony amin'ny kely am-pelatanako.

Mba ho sitrako avokoa izay tinendrinao rehetra,
Fa miara-miasa ireny, ahatonga ahy ho olombanona.
Ka...
Ampahalalao ny misy fa...
Tsy adala aho raha nitoetra
Fa niandry izay voalahatrao avy any am-para lalina.

Kanefa re ry Ray, raha reraka aho anio
Raha resy sady fefiky ny rivotra mahery.
Faingana dia faingana, avia re atonio
Mba tolory tanana aho fa aza avela ho very.

Manko taminao no efa nametrahako,
Ny manontolompiainako anio sy rahatrizay.
Ka na anio na ampitso tsarovy re ny anarako
Reneso ny antsoantson'ny tonombavakay.


Finidy NyAndry
Ambatoroka Faha 25 May 2024
--------