ALAHELO (HASINIONY)

Ry alina ô, avia,
Faingàna ho aho 'zatsy izy; ento re ka ento
'Lay tory sarobidy hanony izato sento
Fa rava ilay fitia

Vaky fela-nenina ny eny moron-dalako
Onin-dranomaso manafotra Fanahy
Ny rivo-namboloiko, ny nofy nisambarako
Nanjary niova endrika, ka manepotra ahy

Ry alina ô, indrisy!
Mangidy sy mafaitra no atohoka ny vavako
Tsy hivaly ve, ry alina, ny ako tonom-bavako?
Mira ho tsy misy.

Ireo tsimoka taraina sy hetraky ny ankaso
Eto amoron-takariva, mampangasihasy irery
Mitobaka ao anaty, 'lay vaingan-dranomaso
Rakotra alahelo, nilaozany niery

Mafisa fo ry alina...
Any ho any mantsy, ambadika any ho any,
Misento toy izao, mijaly toy ny foko, nitia sy mitomany
Fanahy izay tsy fantatro, miisa an'alinalina !
--------