Efa mahazatra (Herizo Ravonjison Andrianitsiahy)

Mpamangy ahy efa hatramin'ny ela,
Ny sento vokarin'ny embona.
Efa sakafo mahazatra ny lela,
Kanefa indraindray toa miteraka aretina!
.
Na andro na alina, tsy azo vinany,
Tsy hananan-tsafidy fa tsy maintsy henoina.
Na sendra mifaly, na sendra tomany;
Dia tsy maintsy hampandrosoana...
.
Toa tahaka ny vato am-babena,
Efa mila tsy ho zaka bataina!
Ny alahelo mianjady amin'ny tena,
Kanefa tsy maintsy lanjaina!
.
Ny sary tehirizin'ny tsiahy tsy azo fefena,
No mandoaka ny fo ato anaty.
Efa fahita kanefa mbola tiana jerena,
Eny na dia mila ahafaty...

.
Ny embona, ny alahelo ary ny tsiahy.
No andaniako ny androko
Efa namana mahazatra ahy,
Sy sakaiza tena mamin'ny foko.
.
➡➡ Nosoratan'i Herizo
RAVONJISON ANDRIANITSIAHY
--------