IANAO FOANA (Ryana)

IANAO FOANA

Efa nofehezina ny eritreritra tsy ho any,
Niezaka ny hanadino;
Ary dia namehy tena tsy hisaina na hanontany
Hoe nahoana ny foko no mbola mino;
Saingy ny anaranao
Sendra henoko niserana
Dia ampy nampisavoara tsotra izao
Ny atifoko, tsy hay noferana…

Efa mba nisikina hery ka namadika ny pejy,
Ny amintsika? Efa vita;
Niezaka nanary dia; nivenjy teny, nikarenjy
Niova làlana, niampita…
Saingy kalo iray izay,
Hira sendra tao am-bavako,
No nampahatsiahy ahy indray
F’ianao no hany tiako ho havako!

Dia nanandrana nitia, nofolahina ny fo
Hahay hiresaka, hitafa;
Satry hiloka ny ho doria, te hanaiky an-tsitrapo
Fa misy anie fitiavana hafa;
Kanefa toa mbola ianao
No notadiaviko tao aminy,
Ny endrika sy toetranao
No nomeko azy mba hindraminy…

Nataoko avokoa izay rehetra azoko natao,
Mba ho foana ny tsiaro;
Na ny mamy na mangidy, notohofako hatrizao
Ny tsara sy ratsy koa naharo;
Saingy tsapako etoana
Fa hery very maina ny ahy,
Ianao tsy haiko hohadinoina,
Am-po, an-tsaina, am-panahy…

Ryana
(29/01/08)
--------