Ny Zanako (Solofomanjato)

Anaka !
Ianao no tena aiko,
Ianao no andrandraiko,
Ianao no antenaiko,
Ho tena fanafody, ka
Ho sitran-tsi-miody,
Ireny feriferiko !
Mameno ny eritreritro !

Tsarovy sombinaiko
Fa zavatra lalaiko
Sady koa hajaiko
Ny fikirizanao
Hanakatra ny avony
Ka ny hasasaranao
Tsy hisy very anjavony

N’inona hidona !
N’inona ihatra !
N’inona baboina ! ka
Ho foana ny eo an-tanako
Tsy ekeko mihitsy
Raha rariny ho an-janako
No amiliana ny Hitsiny

Ho andry iankinanao
Ho aron’ny ankaso
Ho reharehanao
Tsy aharesy tondro-maso
Iny tanako iny, sy
Hamaha ireo fatopato-
Pangejan’ny fanahiana

Anaka !
Satriko ka satriko
Ho anao izao sy izao
Nefa sombinaiko
Tsoriko aminao
Ireny rehetra ireny
Ho zava-poana lavitra
Raha tsy ao ny fahendrena
Sy fitiavan’Andriamanitra

Tsy andalàko hery
Tsy andalàko harena
Tsy ahoako ireny
Raha hanànam-pahendrena
Ho anareo taranako
Ka ny fandresena
No hanondrotra ny zanako !


SOLOFOMANJATO 1999
--------