VONINKAZO (Solofomanjato)

VONINKAZO


Voninkazo tsisy voniny
Fa mpandefitra ao am-po ;

Voninkazo tsisy toniny
Tsy hanitsaka ‘zay voa!

Voninkazo tsy mba resin’
Ny hetraketraka mavàny ;!

Voninkazo mari-drefin’
Ny halalim-potaky ny tany !

Voninkazo mamololona,
Sy maandoko morondrano ;

Voninkazo tsy hitan’olona
Fa maneva tokan-trano.

Voninkazo tena gasy
Mora, nefa tsy hay resena

Voninkazo tsisy tasy
Maitso mavana jerena

Voninkazo tsy mba lefin’
Horakoraky ny voahary,

Voninkazo tsy mifefy
Avonavona hampijaly !

…Voninkazo tsy mba mety
…Lavon-taona nifanesy !

Voninkazo tena « izy »…
Ka mamàka hatrany anaty

Voninkazo tsy mba kivy ;
Hitomany ny efa maty !

Voninkazo, tena tiako !
Voninkazo, faniriako !
Voninkazon’ny fanahy !
Voninkazo, tiako ho ahy !



SOLOFOMANJATO
--------