ILAY MAMA VAOVAO (tsiolaka)

Ilay Mama vaovao vao nakarin'i Dada
toa manalasala tsy sahala amin'i Neny
fa toa malemy paika...! tsy be tabataba
mahay mandangolango rehefa miteny.

Indrindra rehefa i Dada tsy miasa
ka vory daholo izahay mianankavy
hatramin'ny tongotr'i zandry voasasa
miavosa ny orokoroka sy tambitamby

Ilay Mama vaovao vao nakarin'i Dada
rehefa i Dada miasa ka maharitra ela
lasa mandrigo-bolo sy manongo lava
manao vava ratsy sy matavy an-dela

indrindra raha sendra voateny tsy nahy
Ny hasambaran-tsy ritra tan-tratran'i Neny
Ilay fitiavan-tsy ritra sy hatsaram-panahy
dia opa sy ozona no setrin'ireny

Ilay Mama vaovao vao nakarin'i Dada
tena tsisy toa azy raha imasom-bahoaka
milaika famindra amin'ny zipo lava
fa mangotraka be rehefa mamon'ny toaka

indrindra raha sendra azy sorisorena
toa vara-datsaka ny havinirany
raha tsy matim-bono dia ho mosarena
fa izay tratrany eo no tsy maintsy hamikirany

Ilay Mama vaovao vao nakarin'i dada
tany amboalohany moa va tsy anjely?
fa hay menarana manao saron-tava
na oviana na oviana tsy ahasolo an'i Neny.
--------