"JEZEBELA" (Zavona Rakoto (AQUARIUS))

Dia ianao mihitsy no sahy manolo-tena
Ho rembin-jazalahy, ho nofo solon-kena
Miampatra ho resy sy toa adala saina
Ka sahy mamiravira fahatelon’aina

Mbola ianao koa no indro mampivory
Iretsy mamba hena sahy miari-tory
Tsy ampiampy saina ka dia mihanahana
Vao hivarotanao minitram-pahadalana

Fa "EVA" firy sosona moa ianao zavavy
No sahy manozo-tena, mivolo mpamosavy
Mivarotra fanahy, malaina hisahirana
Dia mivira-tena eny an-kodimirana

Tsy haiko na zalahy na koa ianao sakaiza
No tena biby toetra sy zaza ratsy taiza
Fa tokana no fantatro : mitaina loza’se
Misandasanda aina an’elakelam-pe

Ny fitadiavam-bola, ekeko mila aina
Fa raha ny an’ise tsy asa holovaina
Tsy mendrika antsoina hoavim-pirenena
Fa na i Gasikara aza dia hivaro-tena

Zavona Rakoto
--------