You are here: home > Vetso

BALA SIVY… - AbouNusrayni

Azo vakiana?

BALA SIVY…

1.Ny fiarakarahana toy ny kodiarana,
Raha sendra vaky mbola azo tapenana.
Kanefa dia misy ny tsy azo anoharana;
Hita ny soritr'ilay notsetsemana.

2.Io fitiavana'io anie  tranom-bala;
Izay tifitra atao mapihena ny vatsy.
Raha hiovaova ny anao ny malala;
Tsy hanan-katolotr'intsony atsy ho atsy.

3.Ny fo sy fanahy manko misy tadidy;
Izay nambabo azy dia mamela marika.
R'hefa tena tojo ilay voasafidy;
Tsy izy manontolo intsony no voasarika.

4.Ho tapatapany  sisa tavela;
Raha toa variraraka ny fitifirana.
Dia avy eo rehefa ela ny ela;
Ilay fanambadiana tsy misy mangirana.

5.Ny tokantranon'ny Ntaolo taloha;
No naharitra dia tsotra ny antony.
Tsy mba nisy fiarahana mialoha;Ka efa mpivady vao hita ny hakantony.

6.Ao anatiny vao mahita manontolo;
Izay vao mifanoro ny atsimo sy avaratra.
Tsy misy "ex" mety hamono lolo.
Samy voalohany ka mateza tomaratra.

7.Ny tena olana ankehitriny;
Ny fanabeazana dia baranahina.
Ny ankizy foana no omen-tsiny.
Fa na n' lehibe aza ts'hita'ze ho arahina.

8.Izany anefa tsy natao hampifezaka;
Fa tsiahy fotsiny misy ho dinihina.
Natao hisariha antsika hiezaka;
Mba hanatsara izay nomarihina.

9.N'inon'inon'izay efa vita;
Misy hatrany ny azo arenina.
R'hefa mba miezaky ny ho tafita;
Afaka adidy ary koa tsy manenina.

Zoky Habib Abou Nusrayni Idy
23_09_19

Hametraka hevitra

Midira aloha