DERA BIKA (tabarrouj) (AbouNusrayni)

Mbola tsisy niantsa

Hangataka antsa
(Nalaina tao amin'ny vetso.serasera.org)
DERA BIKA (tabarrouj)

1.Tsy oviana mba hitovy - amin’ny vavy raha ny lahy.
Ny an’ny vavy natioraly - ny hamanjany sariaka.
K’inona ihany ary, - ity ataonao mampanahy.
Hilana toky aman’olona, - hampirantiana izato bika.

2.Mety misy latsadatsaka - raha jerena ny tarehy.
Mety misy tsy dia afaka - raha tombanana ny vatana.
Fa rehefa ilay Nahary - no namala sy namehy.
Ny tomoetra anaty vala - no azo antoka hampiadana.

3.Efa noharianko meva – koa no mila ho dokafana.
Na hitafy gony aza - ianao ianie tsy hisy kiana.
Fa ny boatimbolamena - raha toa ka sokafana,
Tsy imasona vahoaka - fa amin’olonkitokiana.

4.Ny piraty no adera - handresendahatra mpividy.
Tsy ilay tena misy vidiny - ka takatr’olona mijaly.
Ny olombanona sy mendrika - raha toa ka hisafidy,
Tsy mikoropaka amin’ny mora - fa manjifa orijinaly.

5.Aleo re asiana lanjany - ny anao ny hamanjana.
Aza avelanao ho lasa - toa fananampokonolona.
Fa ny zava-tsarobidy - rehetra anie ka mazana.
Tsy azo moramora foana - fa mila miady sy mitolona.

6.Ny adala sy tsy hendry, - ireo zaza sy ny antitra.
Samy arisikao daholo - hitahiry anao antsary.
Afaka mampiasa azy - na antrano na ampahitra.
Moa heverinao avy eo - fa ny ho avinao hanjary?

7.Asa angaha mafy be - ny fiarovantenanao?
Asa angaha ka be dia be - ny hery entinao miady?
Fa raha tsy voafehinao, - fafao daholo dieny izao.
Tsy adala daholo anie, - ireo mitandrina ny fady.

8.Koa aza jefijefy toetra – hitaona ireo mpihoby maro.
Fa ampakaronao ny lanja – hahatonga anao ho mendrika.
Ny vehivavy fantadaza – manandrohy mifangaro.
Tsy ifikiran-dehilahy – fa be mpandalo ka ho rendrika.

9.Ny fiarakodia ohatra – namboarin’olombelona.
Misy fenitra arahina – na lasantsy io na gazoaly.
Raha sendra mifamadika – io angaha mety velona.
Tahaka izany koa isika - raha namboarin’ny Mpahary.

10.Ny vehivavy dia fanaja – tsy natao ho mora alaina.
Mila fomba sy harena – ny fisitrahana azy feno.
Ny tenanao raha tsy hiery – fa dia ho zarazaraina.
Any andro any taona – ny vokan’io hiaraha-maheno.

Zoky H.
Abou Nusrayni
JAN 2023
--------
Rohy:
420 0
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0795