NY MARINA FITO ANDININY (AbouNusrayni)

NY MARINA FITO ANDININY

Na samy mino fa tokana ny marina;
Zava-tsarotra ny hampitovy fijery.
Ianao mety mandry, izaho efa miarina;
Ny malalaka aminao amiko mety ho tery.

Na miaraka ambolena aza ny vary;
Dia samy hafa ny fotoana hamoazany.
Ao ny voaelingelin'ny tsiparifary;
Ao ny voaava tsara ka tsy misy fahavoazany.

Izay nobeazina tamin'ny raharaha maro;
Tsy miferotr'aina raha mitokana trano.
F'ireo izay niaingitra kosa mahatsiaro;
Fa raha mitoetra irery dia nidiran'angano.

Ireo izay nandalo finoana samihafa;
Maranitra kokoa ary mandanjalanja.
F'ireo izay nikobona no tsy dia tafa;
Rehefa miady hevitra mirehitra toa vanja.

Ka io saina io eo anatrehan'ny finoana;
Izay namolavolana azy no afaka takariny.
Na dia tobahanao porofo manoloana;
Izay fantany ihany ny azy no fongariny.

Raha hanakiana ny hafa ianao hoe ireto;
Tena very lalana tsy mahalala izay alehany.
Ny manaraby azy ve na koa manapepo;
No heverinao fa mendrika sy misy fetezany?

Ny fo tia namana dia miezaka misarika;
Manatsara toetra sao izay no hambabo.
Fa ny fo maloto no manaratsy sy mangarika;
Ka tsy misaina afa-tsy ny hamely sy handavo.


Zoky Abou Nusrayni
Mba mizara izay mba takatro...fa tsy hoe misy inona!

10_09_2019
--------