You are here: home > Vetso

RINDRA TSY HANINDROA… - AbouNusrayni

Azo vakiana?

RINDRA TSY HANINDROA…

1.Indro tsinjoko avy lavitra - milatsaka ny orana.
Manao fiavy toa mifantina - mifidy tany ho lemana.
Mitsioka mora izato rivotra - ka tsy mba atahorana.
Manafosafo ity tava- sy ny masoko rendremana.

2.Dia tsaroako ilay teny - hoe ny fara-vodilanitra,
Nataony feno famantarana - ho an’izay mahay mandinika.
Izay rehetra voahary - mahatsiaro an’Andriamanitra.
Na ny havoana mankadiry - na ny vitsika majinika.

3.Tsy misy afa-miaina - raha tsy misy ny masoandro,
Mitondra hazavana, - hafanana, otrikaina,
Ny fahazoana rano - koa no maha lava andro,
Raha io no sendra tsy ampy - dia ho maina sy hangaina.

4.Ny zava-manan’aina - dia marefo mora sasatra,
Ka mila fiatoana - amin’ny ora voatsinjara.
Ny masoandro voabaiko - hoe tsy mahazo miakatra
Rah’ tsy ny natiora - no avy naka aina tsara.

5.Izay zavatra miseho - misy kajiny avokoa,
Ny hafanana, ny hatsika, - tsy misy tafahoatra,
Izay zakan’olombelona - no alefan’ny Tsitoha.
Moa tsy izy no Nahary – Namelona, namboatra?

6.Tsara rindra sy nalaminy – ny voahary sy tontolo;
Tsy misy izay tsy sahaniny – na ny ratsy na ny soa;
Ny mafaitra sy ny maminy – Izy no mpikolokolo;
Ka izay miantehitra Aminy – dia ho sambatra tokoa.

7.Ny fitahiana sy ny loza - samy mbola avy Aminy.
Ny hatsiaka mamanala - ny hafanana izay migaina;
Tsy misy afaka mitsoaka - raha mbola eto an-taniny.
Na mpankato io na mpikomy -  azony alaina aina.

8.Ilay rivotra malefaka – mpandrotsy rehefa vizana;
Rehefa be ny hadalana –  fahotana, haratsiana;
Azony afofofofo – misarik’orana mpandringana;
Rehefa tsy mba mankasitraka – izay nahazo famatsiana.

9.Ny haintany, tondra-drano, - tsonami, volkano ;
Izy no mpibaiko ireny - ka famaizana no betsaka
Ireo fahoriana sesehena – fahantrana zary angano;
Rehefa isika mafy loha - ny fontsika ataony tresaka.

10.Mila tonga saina isika - aza ilaozana mipoera;
Misy iraka miandry - dia fitoriana sy asa soa.
Izay tsy mahavita adidy - dia halavony hianjera;
Ialao ny fomba ratsy – ny ho ety an-tany tsy hanindroa.

Abou Nusrayni,
04;05;06_02_20



Hametraka hevitra

Midira aloha