ITIAVAKO ANAO! (ANDRINIAINA1)

ITIAVAKO ANAO!

Itiavako anao ny zavatra rehetra;
Itiavako anao tsy misy fetra.
Ka na ho hafaliana na fijaliana:
Dia ianao foana no tiana.

Itiavako anao ny toetranao tsara;
Mahay mandray, tsy mankahala.
Mahay mananatra sy manoro ny soa.
Mahay mandefitra ihany koa.

Itiavako anao ny endrikao tsy manan-tsahala;
Tsotra, maotina, voakarakara:
Na bika, na fihetsika, na fianjaika;
Manintona, mambabo, manaitra.

Itiavako anao ny fiainanao tontolo:
Mahay mandamina sy mikolokolo;
Tsy tia ady na disadisa na setrasetra.
Fa mahay manaja, mahay mitoetra.

Itiavako anao ny mahay mahery hatrany.
Na ao anatin'ny mangidy na ny mamy.
Mahay miezaka sy mitraka
N'inoninona mihantra.

Itiavako anao ny tsy miova;
Ka mitahiry ny tsara ho lova.
Tsy mba tongan-drombo na taitaitra.
Fa mahay mitony tsy mba maika.

Itiavako anao ny endrik'Andriamanitra ao aminao;
Itiavako anao ny maha olona anao;
Itiavako anao daholo;
Itiavako anao @foko, saiko fanahiko manontolo.

ANDRINIAINA1
--------