ANDALAM-PAMAFANA (DADAFARAtolotra)

Misy ranomaso tsy mitsahatra miraraka
Misy horonan-tady efa madiva ho tafavaraka
Misy horakoraka tsy handrenesam- peo
Dia misy koa fitiavana efa tofoka sy leo
Ka hanadino anao!

Misy fahazavana efa akaiky ho sasakalina
Misy horonan-damba tsy mitsahatra mivalona
Misy saina koa mangarika sy mankahala
Miezaka manilika ny mombanao anjorom-bala
Ka hanadino anao!

Misy tantely andeha hifindra felam-bony
Hitady tsikitsiky hampamirana ny fony
Fa ny mamy teto toa nanjary hifandrombahana
Ka ny vahiny indray no toa voavoky sy voafahana
Ka hadinoiko ianao!

Andeha izaho hitady zaridaina tena mendrika
Andeha hitady sambo izay tsy manaiky ho rendrika
Ilay afaka miampita mamakivaky ny onja
Dia tsy mba manadino na dia iray segôndra monja
Fa tena tia tanteraka!
--------