HOAZY (DADAFARAtolotra)

Tsapako mangina ny tontoko androany
Manganohano maso te-handrotsaka tomany
Rahoviana vao ho afaka amin'ny lalana hizorako
Raovina koa no rovitra ny lamba fisalorako
Ka hisolo lambanao !

Manonofy fatratra, mamisavisa foana
Manisanisa volana hivadika ho taona
Mametraka kinasa mamy rehefa any aoriana
Hoe sambatra ny akaniko fa manan'olon-tiana
Hitanana ny sandriko !

Ahoana raha hidiranao ny varavaram-piainako
Ahoana raha sitraninao ny jaly izay hiainako
Ahoana raha ianao ilay mpanamasaka tokonako
Ahoana raha anaranao anaty bokim-piankohonako
sambatra aho angamba !

Folo izay ny taona nihaonantsika farany
Vao maika miha mandrobona, miakatra ny sarany
Lafo tena lafo tsy mba takatra vidina
Ny hasambaram-poko f'efa manan'olon-tiana
Rehefa tonga ianao !
--------