HARENA (IARANTSOA Mahefa)

Manafoka sy mitsara ny vavan'itsy ngetroka
mahita anay madinika motrongy vao mba homana.
apangaina ho nangalatra vao misy dona-tsetroka
mba mipololotra milefa ny vovonana.

Malaky miahiahy sy mailo izay tsy izy
manaranara maso, mangarika fijery,
mandidy ny mpanampy sy manafatra ny ankizy
hanadihady tsara sao nisy zava-bery.

Tsy mampitombon-tsiraka ny harenanao ry mpanana,
voa an tendron-kazo misarika mpandalo,
mandry an-driran'antsy tsy mahita fiadanana
ny ory toa anao, ...tsy vitsy fahavalo.

Fa ny osa mandry fotsy, kanefa tadidio
fa milamin-tsaina ihany na tsy misakafo.
Ny anay itony hanina arapakay anio
dinitry ny tava novidiana lafo.

Koa aoka re a, aoka, tena atsaharo
ity enjikenji-poana 'reo sahirana mitolona,
ny fiaianana dia ady, saingy kosa aloha fantaro
fa tsy ny harena ihany no tena maha olona.
--------