ISAORAKO IANAO (Malalatiana-Hasina)

Isaorako Ianao Andriamanitra mahery,
nivimbina ny fiainako, tsy sasatra nijery,
na sarotra na mora ny lala-novakina
ny sandrinao tsy niala dia efa fitahiana.

Ny hehy, ny tomany mpandravaka ny andro,
ny alahelon'orana, ny tsikin'ny masoandro
nifandimby no nikolo ilay finoako,
tsimoka marefo nitombo tao am-poko.

Isaorako Ianao Andriamanitra Tsitoha,
mitantana ka raha miondrika ny loha,
arovanao mba tsy hiodina ny dia,
raha tretrika anefa tsy avelanao hania.

Ny haravoana avy aminao no tsy mba lefy,
ny fahoriana indray tsapa fa manefy,
manova aza matetika, sedra ilaina ihany,
tsy mampifikitra amin'ny hosoky ny tany.

MALALATIANA-HASINA
(1998)
--------