Tehaka mirefodrefotra (Nosy Malala)

Tehaka mirefodrefotra,

Tehaka fotsiny aloha,
Mankasitra sy mankato,
Reo mpitondra mahafatrapo,
Lolohavina antampon'ny loha.

Tehaka manarak'indray,
Manohana mandrakizay,
Ny zava-misy mampikolay,
Fa ny seza no arovanay.

Tehaka fampisehoana,
Miseho ho hitan'ny ona,
Matanjaka, tsisy mandona,
Amin'ny tany mora anjonoana.

Tehaka fotsiny aloha,
Mamalifaly ny fò,
Tsy asiana fiasandoha,
Ny Firenena amin'io tena voa...

Reo hafa manao soa etsy sy eroa,
Mampiasa saina, mamaky rondoha.
Tsy miandry tehaka ho valisoa,
Reo marefo mahazo tombotsoa.

Ka tehaka mirefodrefotra,
Ho an'ireo miasa nefa mandefitra,
Manao soa sy tsara eritreritra,
Hialana amin'ny tany efitra..

Nosy Malala,
Jolay 2023
--------