Angamba (Ny Avo Rakoto)

ANGAMBA

Angamba mety hisy ora sy fotoana hihaonantsika indray
Amin'izay fotoana izay :
Ho hitanao ny endriko
Ka ho vinakinao daholo
Ny aty foko manontolo
Nokoboniko hatrizao
Tsaroako tsara manko
Ilay marain'ny alahady
Nihaonana voalohany
Teo am-bavahadin'ny fiangonantsika teo
Ianao niakanjo fotsy dia izaho niakanjo manga
tsy foana tato an-tsaiko; tsy mbola nisy banga
Ny totalin'ny endrikao
Eny hatramin'izao
K'izao aho 'zao miandrandra
Raha toa ka sitrak'ilay Ray
Ny hihaonantsika indray
Amin'izay fotoana izay :
Ho hitanao ny endriko
Ka ho vinakinao daholo
Ny aty foko manontolo
Ho tsapanao mivaingana
Ny herin'ny fitiavana
Nitsiry tato anaty; tsy haiko mba no lavina
Satria ianao no tiana, satriko ho Tiavina.

Ny Avo Rakoto
--------