Nody alina... Ndray andr (Ny Ela Nihetezana)

Nody alina...

Ndray andro aho tara hariva niandry fiara fitaterana
No nitopy ,ka nahita!
Indro Zazavavy iray izay tena fanaperana
Nijoro teny ampita !

nandramako sinangy ,nataoko kipy an'ila
toa maso indray mipika !
kanefa tsy niherika fa toa namilafila
tsy nety nisariaka !

Dia kivy teo ny foko , nahita ity hakantony
fa tsy mba nihevitra ahy !
,na bika na tarehy , na koa filantolantony ,
Manintona fanahy !

Rehefa ela ny ela, zahay no sisa teo
F'izaho tery andafy
Nifampijerijery, fa tsy nahenoana feo
izaho naniry mafy !

Kinanjo rehefa tapitra tsy nisy fiara intsony !
izahay no sisa farany !
nandramako nohatonina, hakako ny ao am-pony
Nanontaniko ny anarany

"etsy ange" hoy aho , andao mba handeha antongotra
Fa hateriko ianao !
Hay izy tsy sarotiny , fa vao maika aza samokotra ,
Nataoko be lazao !

Dia revo izahay roa , nandeha an-tongotra eny
ny lalana tsy akaiky !
F'ity zavavindrano , toa sipa tsy miteny
Fa fotsiny manaiky !

Ny masaka tao amiko dia ho azoko ra-sipa
Fa manaiky zay lazaiko !
fa hay ny andefimandriny efa sasatra eny ampita
Miandry azy , fa tsy haiko !

Dia teo nangasihasy , ilay foko nanantena
Kanefa mody lavitra !
Nanati-badin'olona , ka nody avy eo nivena
Tsy nisy mba nanatitra !

Rehefa teny andalana vao sahy niantso tody !
Niady saina lalina !
tsy vitany efa reraka fa mbola alim-pody
Saika efa sasak'alina !

Ny Ela Nihetezana
--------