Tamberina (Ny Radontsoa Mamiratra)

Tamberina

Horohoron’eritreritra manefy ny tsy misy;
Oriory manantena nofy ravan’ny maraina;
Hariharin’alahelo nasafoton’ny “indrisy”;
Nieriery teny an-tsefaky ny tsiky mody hiraina …

Tabataban’ny omaly mihaika sentosento anio;
Tobitobim-pahoriana natambolin’onjan’ady;
Tebatebaky ny saina te-hilamina sy hadio;
Tebitebin’ny fanahy trotratrotraka sahady …

Horakoraky ny kalo miako anatiko tsy tony;
Harikariky ny vintana miavona sy moana;
Arakaraky ny lasa te-hiaina fanindroany;
Herikeriky ny foko mbola revo miandry foana!

Ny Radontsoa Mamiratra
06/07/2020
--------