ANTSAN'NY TIA (Rabetokotany Latiana (Petakasoa))

ANTSAN’NY TIA

Ranomaso sa fifaliana,
Ankaso sa hamamiana,
Tsy misy hamoizako Anao.

Volana baliaka sa orana mijotso,
Endrika sariaka sa hasina voaloto,
Tsy misy hanadinoako Anao.

Hazavàna maraina sa hariva feno aizina,
Fiadanan-tsaina sa fahoriana tsy azo laizina,
Tsy misy hampisaraka ahy Aminao.

Siokam-boronkely sa fidarabokin’ny onja,
Volana tantely sa olana mafonja,
Tsy misy handaozako Anao.

Hafanàna mahatamàna sa rivotra mifofo,
Fahasalamana sa faharotehan’ity nofo,
Tsy misy hampiala ahy Aminao.

PETAKASOA (Alarobia faha-28 aprily 2010)
--------