Fetiny Androany (Pissoa)

Eritreritra ory
Sy fanahy ngolingoly
No hany niantsapazany -
Fa lavitra, tsy tazany,
Tsy hitany ho banjinina,
Tsy takany ho fihinina
Ilay tiany - tonga fety.
Hany heriny ? Nangina vetivety,
Nisento ... "Any izy izay !"
Niandrandra ilay Ray
Dia nanomboka nivavaka.
Notononiny niavaka
Ary tena niangaviany :
"Any iny namako iny !
Ray ô, fetiny androany
Ka aoka ho sesilany
Ny fitsimbinanao.
Raha toa ka azo atao
Dia ampio izy hikolo
Ny hoavy manontolo.
Aoka ho feno ny hasambarany !
Ray ô ! ... Fantatrao ny anarany."
--------