Ny hany vavako ... (Pissoa)

Raiko ...

Ireo nataoko ho fahavaloko;
Ilay akany tsy atakaloko;
Ireo nisompatra ny nofiko;
Ireo nijoro mba ho tokiko;
Ireo sahy miseho ho mpankahala;
Ny fitiavako an'i Lala;
Ireo nigafy tsy an-kiera;
Ireo namako an-tserasera;
Tsy misy miafina Aminao ...

Ny olana izay mifandrombaka;
Ny hafaliako mba nitobaka;
Ireny tebitebin-tsaiko;
Ity fianarana lalaiko;
Ny alahelo tsy voateliko;
Hatramin'ny tsiambarateloko;
Ny anio mirakitra ny ditrako;
Sy ny ampitso mbola tsy hitako;
Tsy misy miafina Aminao ...

Tsy misy miafina Aminao
Eny, ny amin'izao tontolo izao.

Nefa ...

Raha hivavaka aho androany,
Dia mbola hotanisaiko ihany.
Hitalahoako fihavaozana,
Ka ny ratsy no ilaozana.
Iangaviako fitahiana,
Ho foana ny ady, fijaliana.
Izay sitrakao no ho tompon-daka,
Ny Fitiavanao no hanjaka.

Sanatria tsy fahazarako,
Fa izay no hany vavako.

Pissoa
--------