Tsy Tiako hono (Pissoa)

Tsy tiako hono

Tsy tiako hoy aho ianao !
Fa vao hitanao maloka
Ny endriko mazàna
Dia iny ianao tsy tana,
Tsy mety fa mikaroka
Ny hampitsiky hatrany !
... Izaho te hitomany.

Tsy tiako koa ianao,
Fa minitra vitsy ihany
No avelanao hitoetra
Ny embona sy tsetran'
Ity lavitra akany ;
Lavitra ny maro.
... Izaho mba te hahatsiaro.

Tsy tiako mihitsy ianao !
Fa na inona antenaina
Katsahina isan'andro ;
Angamba aza raha masoandro
No tadiaviko alaina,
Dia ho atolotra sahady !
... Izaho mba te hitady.

Nefa hatramin'izay
Tsy teto ianao hisangy,
Dia tontolo babangoana
Sy voaary toy ny moana
No tonga mba mamangy.
Dia hoy aho anatiko ao
... Sao tiako ihany ianao ?

Pissoa
--------