Fotsiny (Rado)

Tiako fotsiny ianao
Tsy asiana hoe "Nahoana"
Na tovonana "Satria"
Fa tiako fotsiny amin'izao
Tsy amerana fotoana
Tiako fotsiny doria

Ny "Satria" sy ny "Nahoana"
Mety ho takatry ny saina
Tetika ikendrena laka ...
Haingon-teny babangoana
Rindram-bolam-bery maina
Ravina tsy misy faka

Tsy ny teny izay tononina
No hahafeno fitia
efa feno rahateo
Tsy ny toky izay foronina
Mora rava sy malia
Fa ny fo tsy manam-peo

Rado
--------