Sedra (Rado)

Nantsain'i jantina
(Nalaina tao amin'ny vetso.serasera.org)
Ny sedra ange, sakaiza
na ho aiza ianao na ho aiza
tsy orana mitraho ahina hirotoroto
ka iomanantsika hanjairana sarotro...
Na lefom-pahavalo
ahina hampimalo
hanevika ny fo, na hampitondra ratra
ka anefena ampinga ho fiarovan-tratra.

Fa donan-kerivaika
tampoka fiantraika
hitsapa ny hamafisan'ny fototra nalevina
sao tsy vodivato madonda sy matevina.
Fa afo mahamay
tsy re fiavy izay
hitsapa ireo akora amin'ny fitselany
na tena volamena, na hosoka eto ivelany.

Ka raha tonga tampoka
ny sedra ka manampoka,
Eo no andrefeso ny herinao anaty,
sao afona-mololo mirehitra dia maty
Na tanjaka am-panahy
mijoro tsy manahy:
Finoana lalim-paka tsy lefin-korohoro
Fa donim-pitsapana vao mainka koa mijoro.

Septambra 1993
--------
Rohy:
Sokajy : Fankaherezana
3620 1
Mpakafy: MioraR
Hametraka hevitra
Midira aloha
Momba ny tononkalo
Mpanoratra : Rado
Nampiditra : hery
Daty : 02/11/2022 20:38
Antsantononkalo
Nantsain'i jantina
© Eugene Heriniaina - serasera.org 1999 - 2024 - page load 0.0153