Mpangalatra - Rado
Ataoko hoe mpangalatra maha-te ho tia
'nareo mpamoron-kira
Ataoko hoe mpandroba tiako hisakazaina
'nareo mpikalokalo !
Fa firifiry moa ny sary tao am-poko
tsy haiko nolokoina..
Firifiry koa ny embona malala tsy haiko naparasaka
fa nataonareo tena tsisy valaka,
tena tsisy very tamin'izay nosainiko ?
Fa rehefa tia ny foko, toa ianareo indray
no tia ilay notiaviko,
fa nahita hira tena tonga lafatra
tiako hatolotra azy !
Rehefa manina aho dia noloaranao
ny embona ato am-poko, ka toa ianao indray
no manina azy alohako !
Hany sisa heriko, miteny irery hoe :
tahaka izay indrindra no efa tao am-poko
fa tsy tafavoakako !
Nony nalahelo ny tanindrazako aho
ka te hihira ho azy, dia ny hiranao
no nahavoaka indrindra izay tiako hankalazana
ny endriky ny taniko !
Raha voafitaka aho, voafitak'olon-tiana
ka rendrika ao anatin'ilay famoizampo...
Ny hira tiako hatao sy saika noforoniko
hanala ny alaheloko, hay efa vitanao !
Tsy maka sarotra aho, fa isaky ny misy
kalo tiako hilaza ny antsipiriam-piainako
dia izay nataonareo no tonga tsy nantsoina
eo imolotro eo.
Mpamantam-bonona aho, r'ilay mpamoron-kira,
r'ilay mpikalokalo,
Satria 'nareo mihitsy no mpitsongodia
ny làlana nalehako, ka nahita hira
mifanendrika aminy !
Koa angalaro ihany ny ato anaty foko
fa odiako tsy hita,
Fa raha tsy haiko tsinona ny hahita kalo
haneho ny ao am-poko, haninona aho ange
no dia ho saro-piaro ny zavatra tsy haiko ?
Koa angalaro ihany, ka angalaro foana
izay tahirim-poko, ry mpamoron-kira,
Ka tonga dia midira !
Robay tanteraka aho, ry mpikalokalo,
mpitsongodia ny foko...
Ka aza dia mandalo
fa tsy mihidy akory io varavarako io.
Dia misaotra indrindra, nangalatra ny foko!
2 Febroary 1995
Hevitra mandeha
Masoandro Mainty (16/02/2017 12:27:52)
Tena marina!Izao mihitsy ilay saika hosoratako,hay efa voasoratr'i Rado
Misaotra!
rfanomezantoky (20/09/2019 10:41:02)
inona ndray moa no hambarako fa de efa io nangalariny io daholo
AZTECA (29/04/2022 12:52:14)
sao misy manana manontolo ilay tononkalon -dRado misy hoe
"izay very vakana,mbola hitady
izay very sampy, mbola hanolo,
ny zanaka kosa tsy tahaka an'izany
ny toera-nialany tsy mety voasolo"
Mankasitraka sahady ho an'izay mamaly
Mombamomba
Mpanoratra : Rado
Nampiditra : ikalamako
Daty : 06/09/2016
Mpamangy : 14764
Mankafy : 4
Tononkalo hafa
TSY VOASOLORy tenindrazako
MPANGALATRA
Noho ny zanako
Tanjona
Ny poeta
INAY
TOPIMASO
RAY Ô!
Angamba
