MALOK'ILA (Rakotomalalason Jean Olivier (R.JO))

MALOK’ILA

Ho rava ihany angamba ny amintsika roa
Na hita tena sarotra ny hamafa anao am-po
Hahay hanadino ve ny fo mifankatia ?
Hidify fahatsiarovana izay tsy maintsy hanaradia

Mangotraka izay tsy izy ny adin’ny fanahiko
Ny hoe rahoviana ihany ianao no mba ho ahiko
Malok’ila foana ve ny androm-piainantsika
Lay sombin-kafanana toa ho resin’ny hatsiaka.

Kanosa ve ny tenako raha toa ka manaiky
Ny hamela anao, hitoetr’irery, hanjokaiky
Safononoka ny foko, safononok’alahelo
Ka injao fa latsa-tsento, in-droa, in-telo …

Malalason 04/05/07
--------