Aleo mifidy olona vaovao (raozigasy)

Ny Governemanta migoragora
Ny miaramila mibala rora
Ny lalam-panorenana voadika
Izany va re no hoe politika ?

Ny firenen-kafa efa lany haiky
Amin’ilay fisainana izay taraiky
Hatramin’ny valala efa tsy manaiky
Migrevy manidina akaikikaiky

Ny vahoaka mihinana ny tsy tiany
Sa kaikitr’ilay amboakely tiany ?
Tsy hita izay marina azo ambara
Ny ampitso sisa no aoka hitsara

Isan’andro mitobaka ny vaovao
Mitanisa izao rehetra rehetra izao
Hoe tsy misy mety hono izay atao
Kanefa dia mbola mijanona ao

Maninona anefa raha toa mandeha
Ny saosy voaangona efa be dia be
Sao iverenan’ny 10 aogositra
Izao mbola tsy tara raha toa handositra

Dia ento ny namana sy ny akama
Indrindra ireo foza malamalama
S’ireo mpamadika palitao
Aleo mifidy olona vaovao
--------