Cahier de souvenir (raozigasy)

Nantsain'i
(Nalaina tao amin'ny vetso.serasera.org)
Ianao izay mahatsiaro ho Tanora zokiny ihany
No mahalala sy mahay izay voasokatro eto ambany

« Cahier de souvenir »

Hitako tsinahy tam-pampirinan’entana
Ilay « cahier de souvenir »
Tsy nihamba aho nanokatra,sady nientanentana
Nazoto nikirakira

Nasesiko ny pejy,nokajiako sao rovitra
Dia hitako ianao
Nitsikiako mora,na dia henoko nihovitra
Ny tao anaty tao

Novakiako miadana,tam-pameloman-dasa
Ireo soratra sy hafatra
Nobanjiniko mangina,ilay sary misy havatsa
Ndrii .. fotoana tonga lafatra

Hoy ianao mantsy : roa ny zava-tiako
Ny raozy sy ianao
Ilay raozy halazo anio, fa mandra-pikimpiako
Ho tiaviko ianao

Nasianao sary fo,natao tam-pensilihazo
Nolokoinao mena
Nopetahanao baraingo,hoe mazava ve sy azo ?
Ekena sa tsy ekena ?

Namaranana azy, tsoraka ankitelo
Sy ny daty tamin’izany
Namerina tadidy,sy nampamelovelo
Ny telopolo taona lasa tany

Dia teo aho velon-kira
Nitanisa ireo “delira”
Nivalon-tan-dakira
Oh.. “cahier de souvenir”

© Raozigasy 05/04/19
--------
Rohy:
1223 2
Hametraka hevitra
Midira aloha
Momba ny tononkalo
Mpanoratra : raozigasy
Nampiditra : raozigasy
Daty : 22/05/2019 21:36
Antsantononkalo
Nantsain'i
© Eugene Heriniaina - serasera.org 1999 - 2024 - page load 0.0291