Dia gaga ianao hoe rahoviana (raozigasy)

Dia gaga ianao hoe rahoviana
No hisy lamina tiliana
Sy fiadanana azo andrasana
Ankoatry ny hoe rehefa any am-pasana

Dia gaga ianao hoe rahoviana
No hisy hanina vidiana
Sy harotsaka am-bilany
Amin’ity an-tanan-dany

Dia gaga ianao hoe rahoviana
No ho tantera-paniriana
Ireto valalabe tsy mandry
Ka am-pahalemena no handry

Dia gaga ianao hoe rahoviana
No ho lasa tsiky ny hakiviana
Zary ravaky ny endrika
Sy sento Malagasy rendrika

Dia gaga ianao hoe rahoviana
No tsy hisy lio hikoriana
Hanjezehana ny tany
Mitaky izay mba fiovany

Dia gaga ianao hoe rahoviana
No hisy olona mba liana
Amin’ireto zo vingaina
Ts’isy mpamonjy an-karankaina

Dia gaga ianao hoe rahoviana
No hisy sata tsy hambaniana
Fa hapetraka amin’ny hasiny
Akarina amin’ny tsikasiny

Dia gaga ianao hoe rahoviana
Ity poeta vao hangina
Fa hitabataba lava
Sy hitatatata-bava
--------