You are here: home > Vetso

Fitia mandava-taona - raozigasy

Azo vakiana?

Fitia mandava-taona

Ny fitiavana  kaloiko
An-takarivantsika
Dia raki-tsentom-poko
manempo ny hatsiaka
ka mamadi-dinitra
ilay ngolin’ny ririnina
ho fitiavan-tsy ritra
ka mafana fihinina

ny fitiavana kaloiko
an-takarivantsika
dia ilay feo tsy foiko
fiombonantsika
ka na mamanala aza
ilay siokan-drivotra iny
ny hirako eo milaza
ilay vetson’olon-tiany

ka am-pototsofinao
no ampangoritsihiko
ilay fitiavako sy ianao
mamy ka bitsihiko
ka ireo angon’hafanana
sy joala tsara doro
no mainka mampitana
ilay fitia tsy hikoro

ka ireo naotin’ny fonao
aza ovainao ny feo
fa hirao sy dradrao
fa izaho tsy ho leo
hampanakoy anatiko
ilay horovitsika iny
iloaran’ny tsy tantiko
toy ilay tamin’iny

fa ny fitiavana kaloiko
an-takarivantsika
efa fantatro ry foko
fa tokana amintsika
ka ireo no asandratro
hitety lohataona
hisedra fahavaratro
ho fitia mandava-taona

Hevitra mandeha

Zozoro (15/08/2010 20:25:30)

Mba satriko indrindra ny hihaino ilay feo
sy ny hiranao
Ho fahasambarako mantsy izy reo
raha atolotrao
Satria feno tsiky sy hevi-mafonja
noraiketiko am-po
Enti-mandresy ny hery ny onja
tsy tiana hifoha

Soarilala (14/03/2013 16:05:46)

Ilay fitiavana kaloinao
An-takarivantsika
Tiako ho re sy heno izao
Mba iombonantsika

Ireo bitsika fanaonao
Ka ampangorintsina ahy
Ao ampototsofiko ao
Tsy tanty tena mampanahy

Hametraka hevitra

Midira aloha