Hatraiza no faran'ity revy ity (raozigasy)

Hatraiza no faran’ity revy ity
Ary hiitatra hatramin’ny rahoviana
Fa ny olona rehetra hatraty Paris
Efa mivary raraka be manakiana

Sa atao resaka “feu de l’amour”
Tsy hita mazava fa miodina eo ihany
Ny vahoaka anefa mangovi-mijoro
Sy efa mitrongy mandady amin’ny tany

Hatraiza ny fefin’ity revy ity
Ary hiova rehefa rahoviana
Fa minanaka hatrany Etazonia
Ireo Malagasy tsy heno, nangina

Sa atao resaka varo-bilany
Samy miteny izay sendra ny vavany
Ny ekena ekena, ny atao atao ihany
Dia samy miaro izay havankavany

Hatraiza ny fetran’ity revy ity
Ary hivadika oviana ny rasa
Fa hatramin’ny akama any Abu Dhabi
Manaparitaka kozy mandrasa

Sa atao antso mpivaro-tsarbô
Mivazavazà ialahy any ho any
Fa izahay ato an-trano mbola dodo
Tsy problemanay raha izany

Hatraiza ny “fin” amin’ity revy ity
Ary rahoviana ny “episode” vaovao
Ampy izay ilay “regime” hoe mampahia
Sy ilay esonesona tora-bilao

Sa atao antso tsy misy “reseau”
Fa anaty tunnel foana isan’andro
Aleo hikiaka ireo mpanao “allo”
Fa izahay ao anaty harena no mandro

Hatraiza sy ahoana ity revy ity
Iza no afaka hamaly an’izany
Fa ilay fifidianana mbola “magie”
Toa mbola tsy heno akory miala any
--------