Ianao sisa tsy ampy (raozigasy)

Ilay anaranao,
Efa vita sokitra tamin’ny lalan-dioko, manaraka ny halavany
Tsy ho afaka ao intsony, izy mandrakizay, mandram-paharavany

Ilay sarinao
Efa vita dika, ao anaty lalin’ny zanak’ ati-dohako
Ka na inona mitranga, izy tsy hivoaka, na ho faty alohako

Ilay feonao
Efa voatahiry, any an-kitsokitsoky, ny retsi-tàdiny
Ka na harenina aza, ny sofiko rehetra, heno foana iny

Ilay toetranao,
Efa hain’ny toetrako, niarahany nizotra tamin’ny fanahafana
Ka na aiza misy ahy, izy eo aveloko, tsy afaka fanafana

Ianao manontolo,
Efa nosoniaviko, tamin’ny tontoloko, fa ho ahy mandrakizay
Ka tsy hisy hafa intsony, hahasolo azy, ho vaovao indray

Ianao sisa tsy ampy, hampisy vatana azy, dia ho lafatra ny fiainako
Ary izany rehetra izany, no vavaka isan’aliko, sy vavaka marainako
--------