Kajy (raozigasy)

. . . Diso ve ny kajiko ? . . .
Raha toa ny taonanao
Ilay tamin’ny taona firy
Sy ny halavanao
Iray metatra sy firy
. . . No valiny mba azoko ? . . .

. . . Diso ve ny kajiko ? . . .
Raha toa fifandrifiana
Amin’ny toetranao
Tsy alana tsy ampiana
Fa tonga dia ianao
. . . No valiny mba azoko ? . . .

. . . Diso ve ny kajiko ? . . .
Fa tena mety tsara
Ilay ianao rehetra
Na mitombo na mizara
Tonga dia mitoetra
. . . No valiny mba azoko ? . . .

. . . Diso ve ny kajiko ? . . .
Satria na ny porofo
Nandrasako hanamarina
Ilay kajikajim-po
Niteny anao ho marina
. . . No valiny mba azoko ? . . .

. . . Diso ve ny kajiko ? . . .
Raha toa ianao irery
Miampy izaho tokana
Roa hanjary iray
No atambatra atokana
. . . No valiny mba azoko ? . . .

. . . Diso ve ny kajiko ? . . .
Raha diso re ny kajiko
Kajio hoe mba jerena
Sao betsaka ny tsy azoko
Mba hitsarako tena
. . . Amin’izay valiny azoko . . .

05/07/2004
--------