Kanto varo-boba (raozigasy)

Tsikera kely azoko, dia indro fa zaraiko
angamba mety hoe marina, fa tsy niasan'ny saiko
nanambara izy mantsy, hoe ny an'i Raozigasy
tononkalo varo-boba, maty kapoka sy hasy

Ny kanto hoy izy mantsy, tsy tokony ho toy izao
hoe aparitaka etsy, ho an'ny tsy misy atao
fa tokony homen-daka, akarina ambony
fa tsy zarazaraina amin'ny sehatra toy itony

fa lasa maivan-tsanda, tsy hanan-danja intsony
tantely afa-drakotra, tsiro tsatsoin-drony
izay leitsy no mba teniko, fa an'ialahy ny sisa
dia mahaiza mieritreritra, sy mamisavisa

….

dia nalaiko ambony, sy nalaiko ambany
angamba misy marina, izany teny izany
kanefa ilay mizara no tiako sy mba mamiko,
ary izaho tsy noterena, ahy ireo fa tsy nindramiko

sa andrasana ho faty, sy levona ny nofoko
izay vao hozaraina, ireto nofinofiko ?
sa andrasana ho lo, sy rotika ny vatako
izay vao adradradradra, hoe ireo ilay nosoratako ?

ny sandany amin'izay, tsy izaho intsony,
no maheno azy, sy ny feo akoiny
fa tontolo vao sy hafa, lokanga tsy mitovy
no handalina azy, sy mba hanao zovy

…

tsy aleoko ve anio, dieny mbola velona
izaho no mizara, ireo aingako miselona
ka na teny maharary, na tora-boninkazo
no takalon-tambin-tsoratro, mivantana aho no hahazo

tsy aleoko ary ve , hozaraina androany
ireo rediredim-bavako, dieny izaho eto an-tany
ka na kiana na tsikera, na sitraka na ompa
eto am-pahavelomako, ny onjany mitopa

aleo fa tsy maninona, ekeko ny an'ialahy
hoe kanto mora vidy , no soratra mba ahy
aleo fa tsy maninona, aleo aho hirobaroba
aleo hiainga ny fanahy, ho tononkalo varo-boba
--------