You are here: home > Vetso

Mifohaza ianao Ramalagasy - raozigasy

Azo vakiana?

Mifohaza ianao Ramalagasy
F’aza ilaozanao milasy
Kamokamo mivaloharika
Nefa ny rano efa halohalika

Mifohaza ianao Ramalagasy
Aoka izay ilay be "fidasy"
Fa ny trambo efa mandady
Nefa ianao tsy hita hiady

Mifohaza ianao Ramalagasy
Ilao ady ireo “fokasy”
Aoka izay ilay fahalemena
Ireo hitsakitsaka aza ekena

Mifohaza ianao Ramalagasy
Sa mety aminao  ilay “pasy”
Hoe handefi-dalandava
Sy hikombona ny vava

Mifohaza ianao Ramalagasy
Sao hanenina sy hangasy
Raha mitohy lava ity tetezana
Ka ataon’ny olona fihomehezana

Mifohaza ianao Ramalagasy
Mibetroha, raiso ny basy
Sa ianao moa tsy mbola leo
Ity “tsindrio fa lavo”n-dry zareo !

Mifohaza ianao Ramalagasy
Fa mankaleo ity balaoasy
Sy bilao atoraka isan’andro
Mosavy tratry ny masoandro

Mifohaza ianao Ramalagasy
Ireo rehetra fopla roasy
Fa aoka izay ireo “parade”
Mba tezera, ndehana miady

Mifohaza ianao Ramalagasy
Sa ny fonao ve glasy
Sa efa donton-donilony
Ka efa tsy mafana intsony

Mifohaza ianao Ramalagasy
Mandraisa andraikitra “en fasy »
Aongany ireo izay tsy mamely
Sy dongadonga fa tia-kely

Mifohaza ianao , mifohaza
Sa tsy mba leon’ny resa-jaza
Sy fitondrana kilalao
Ka dia  hijanona amin’izao