You are here: home > Vetso

NANDALO IANAO DIA NISERANA - raozigasy

Azo vakiana?

Ho setrin'ny tononkalon'i ZOKY hoe NANDALO IANAO DIA NISERANA

Nandalo ianao dia niserana

Ny volo nahifika tsy aritra  
Toa rambon’omby mandroaka lalitra
Nefa nampivaivay ny afo tanatiko
Ka ilay hafanana tsy tantiko

Nandalo ianao dia niserana

Ny masonao nitopy niharo harika
Kanefa toa vanja misarika
Sy   kopaka ary tsoka nandrehitra
Ilay forohina anaty forehitra  

Nandalo ianao dia niserana

Ny molotrao jereo mena fify
Nasianao loko manify
Nefa nataonao mangirana
Ka tonga ny foko dia kirana

Nandalo ianao dia niserana

Niniako nojerena manatrika
Ireo tratra nanao jery atrika
Ka saika samy jery atrika isika
Tao anatin’ny indray mipika

Nandalo ianao dia niserana

Ny akanjonao mampidera takiba
Ka ny masoko tena niliba
Ny saiko tena lasana lavitra
Izaho efa mitady tsy ho avotra

Nandalo ianao dia niserana

Niselona kely dia dify
Ilay bika nirako-manify
Maneho ny hakanton’ny voatra
Izaho nefa tsy afa manoatra

Nandalo ianao dia niserana

Dia noseranin’ny saiko adala
Satria izaho koa mahalala
Fa ny anjely izay latsaka an-tany
Dia naloan’ny lanitra izany

Nandalo ianao dia niserana

Narahiko maso avy aoriana
Ilay fidola mahabe faniriana
Sy nampientanentana anaty
Mahabe fahotana mahafaty

Nandalo ianao dia niserana

Nivesatra fakam-panahy
Nitoraka voa mahatsiahy
Fa ny olona vatana ihany
Lalan’ny fiainana izany

Nandalo ianao dia niserana

Ny eritreritro tsy azoko ferana
Ny rediko tsy misy andeferana
Ka aleo hanaram-po
Ny maso , ny saina , ny loha

Nandalo ianao dia niserana

...  

Sokajy : Aingam-panahy

Hevitra mandeha

nyeja (25/07/2006 08:56:34)

nandalo marina izy dia niserana a
mahereza re ry raozigasy a
Ny Eja namanao

zoky (25/07/2006 14:25:55)

misaotra an 'i raozigasy, fa hafa ihany rehefa vetson'i Mpanakanto ny NANDALO IANAO DIA NISERANA, tena milay,tsara e! misaotra sy mankasitraka, tohizo fa tsara e!Mahereza

raozigasy (09/08/2006 12:32:08)

misaotra an'i Nyeja sy zoky izay tena samy ZOKY tokoa eo aminj'ny fanoratana e !

Hametraka hevitra

Midira aloha