Ndrii (raozigasy)

Niantsona an-tseranana, ilay fiaramanidina
iny ny anao lahy, nanaraka ireo mpidina
dia nitanjozotra, nanao lala-manjohy,
ny rehetra teo aloha , no natao solon-drohy

dia niandry naka entana, nanahaka ny olona
sady mba nikevoka, hoe vita teo ny tolona
fa hahita zavam-piainana, fa tonga aty an-dafy
hahita paradisa, sy tsy hiafiafy

nony azo ilay kitapo, tsy dia navesa-batsy
dia nanaraka ny tondro, hoe ny fivoahana atsy
nivoaka ny seranana, ranga koa ny maso
niandry ilay mpitsena hanao hoe andraso

kanjo ….

tsy nisy na iray, izay mba nanontany
hoe sao dia ianao kay, ilay tsenaina izany .
Fa lasa daholo ny olona, nanaraka ny havany
izy sisa teo, nihamena koa ny tavany

dia nandeha ny adisanina, sy fampiononan-tena
mety hoe tarakely, angamba ilay mpitsena
dia naka saina kely, dia natao an-tsamboady,
ilay kitapo tokana, namana sy vady

teo vao notsakoa-nenina, tamin'ny kitoa
fa ilay finday, tsy nalaina moa
fa natoky fahatany, ilay olona izay mpaka
izay tsy hay akory, na i koto na i zaka

ndrii

ny toerana haleha, tsy fantatra akory
ny tena an-tanin'olona, vato boribory,
tsy mahalala inona, tanavo miaka-bohitra
adrisa very fanahy, an-tanin'ny sorohitra

dia saika hoe hipetraka, hisotro koa kafe,
vao nanao kaonty baoritra, hay ka volabe
natao fampitahana tamin'ity ariary
tonga dia nangotika ny kibo, naharary

ny teny koa tsy hay, izay no tena olana
tsy sahy hoe hanontany, sy hisolantsolana
ka hany sisa hery, naka sisiny nangasy
ilay mpitsena angamba, nanao fotoan-gasy
--------