Omeo lesona (raozigasy)

Tononkalo nangatahan'ilay namana iray ao amin'ny vondrona Tononkalo Malagasy. Bonaika loatra hono izy ka mba mila fanampiana. Ataontsika hoe Andriamatoa G. no anarany

Izaho tsy saro-piaro, fa tsy tiako fotsiny, ilay namanao fahiny
iresahanao lava, hitsiahivanao ny lasa, efa ho adiny dimy
dia eo moa ianareo mifamoha ny tsy haiko, hoe tany am-pianarana
miampy kakakaka, sy hehy adaladala, fitia diso varavarana

Izaho tsy saro-piaro, fa tsy tiako fotsiny, ilay namanao fahiny
mitsidika matetika, mamangivangy anao, izaho ilay tsy eo iny
dia ao ianareo mitokana ao an-trano, miara mihaino hira
izaho aza moa miantso, tsy raisinao akory, toa tsy asianao sira

Izaho tsy saro-pîaro, fa tsy tiako fotsiny, ilay ianareo roa
manan-tontolo hafa, lasa novelomina, omaly vao nafoha
dia ianareo irery no mifampizara ilay tantara tsy haiko
ka dia vaka ihany, sy tsy dia mazava, na ny foko na ny saiko

Izaho tsy saro-piaro, kanefa moa maninona, raha mianatra mba miova
toetra mpiaro ny ahy, tsy te ho diso safidy, tsy te ho ratsy lova
ka raha misy namako afaka hampianatra, eo re omeo lesona
sao ilay fahatsorako, no hamitaka ahy, izay aho vao tena fesona
--------