Rahoviana indray (raozigasy)

Tsy andriko ny anio, hoe andeha hivory
Ary alina aza,zara raha natory,
Nihevitra ny androany, hoe hifankahita
Ny tsy akaiky aza, fa ianao ery am-pita

Dia nihaingo sy nijejo mba nanao manimanitra
Hisarihan-jery, ilay andriambavilanitra
Nanomana kabary, karazan-hainteny
Hanintonana azy, rehefa injay hiteny

Ka tan-dia an-katoka, sy hazaka madinika
No nifindrana toerana, raha handeha hidinika
Hamonjy fivoriana, hihevi-draharaha
Nefa ny tena marina, hitady anao, hizaha

Tonga tao anefa, ianao tsy hita akory
Banga ilay toerana, an-databa-boribory
Nangina teo ilay foko, niridam-pitempoana,
Fa seza ts’isy olona, no sendra nanoloana

Dia namboatra saina, angamba izy tara
Ka niezaka ny hanemotra, ilay hevi-tian-kambara
Fa hoe hiandrasana azy, hangalaran-jery
Ilay masony sariaka, ka izaho ho voajery

Kanefa , nandroso ny fotoana, ny tafa koa nimaona
Ka voatery ihany, nandoatra ny tan-daona,
Nizara ireo voahevitra, tsy tanoloanao
Tamin-banjin-dranga, hendra-pitady anao

Vita ny fotoana, nirava ny fivoriana
Nangasy koa ny foko , ginam-paniriana
Dia nanontany tena, hoe rahoviana indray,
Asa loatra lahy, f’izaho mangaihay

Dia nody an-tenda maina, nanantena tsy misy
Rahoviana indray ,vao alakamisy
Hanantena indray, ny fahatongavanao
Ny sampona iangaviako, tsy hisakana anao
--------