Ratsy vintana (raozigasy)

Foana izato paosiny
F’ilay vola saika kaofiny
Raraka sy very
K’izy tsy nahajery

Fa nanjavon-tsy hita taratra
Natelin’ito tatatra
Ireo madinika fameriny
Ka tankina ny jeriny

Ka tsy afaka mba hila
Na hividy tapakila
Hanohizan-dia
Am-piaran-dalam-by

Ka sisasisam-pitra
Sy ranomaso ritra
No mba hany namany
Rosian’ny tsy fananany

Satria tsy maintsy hody
Dia indro fa nisody
nanaraka an-tsisika
mpandeha hafa sisa hirika

vao mainka anefa atambo
fa tratry ny haza lambo
sendra fisavana
ka tratra nihanahana

dia voasazin’ny lamandy
fa tsy nahita vandy
ka tsy afa-niala maina
ka teo torovan-tsaina

dia resy , ana, sina
ilay olo-mangina
fa sendra vintan-dratsy
ilay naman-dany vatsy
--------