Reny, Neny, Teny (raozigasy)

Reny
Neny
Teny

Teny telo tena samy fototr’aina
Fakan-dimby telo samy lovan-tsaina
Sahalain’ny fo anefa mba hitovy
Tsy anavahana an’iza na an-jovy

Reny
Loharano nipoiran’ny fisiana
Angovon-tamby nahato ny faniriana
Vodi-vato orim-pijoroan’ny andry
Hery vaika nampahatanjaka ny sandry

Neny
Ilay tokana izay nanome ny aiko
Ilay nampianatra ahy ireo zavatra tsy haiko
Ilay nikendry hatranihatrany izay ho tsarako
Ilay namorona ireo zahatra ifaharako

Teny
Izay fototry ny sata ijoroako
Izay hasina mirakitra ny zoko
Izay mpizara ireo tsy tantin’ny foko
Izay mampiorina ahy amin’ny finoako

Ka salanitra ianareo androany
Sambara mandra-mpandao izato tany
Arahabaina noho ity tonon’andron-diary
Soava tsarà, tsy harofy tsy harary
--------