Tsara be ialahy (raozigasy)
(Nalaina tao amin'ny vetso.serasera.org)
Tsara be ialahy !!!Io ravehivavy, sahirana mitady
Izay jaika tsara, sy loko hoe miady
Amin’ny tafy anio, fa andro lehibe
Ka mila miova kely, fa sao dia mampihomehy
Io ravehivavy, sahirana mifidy
Izay raitra miavaka, dia manokatra manidy
“commode”, “penderie”, “placard” sy “armoire”
Dia tsy azo adalaina, sao mahazo ny kafara
Io ravehivavy, sahirana mandinika
Ny ady riman-doko, hatramin’ny madinika
Bokotra , “foulard”, poketra sy kiraro
Fa misy hono loko, tsy mety mifangaro
Io ravehivavy, efa adiny iray
No mamoaka akanjo , sy mandraindray
Manoloana ny fitaratra, mampitovy, mampijery
Sy manao kajikajy, dia miteny irery
Io ravehivavy, anatin’ny tontolony
“ity efa nanaovako” hoy ny fipetso-molony
“ity efa fahita” ka tsy hanaovako intsony
“ity izao no lamaody”, loko vonivony
…
Dia afaka ora roa, izy nivoaka tao
Tsy mbola matoky tena, fa “mety ve izao ? “
Dia ralehilahy sahirana, ka tsy sahy manda
Fa tsy sazoka miteny, “tsarabe ialahy”
© Raozigasy 29/12/2016
--------
Rohy:
