Tsoriko aminao (raozigasy)

Izaho akory tsy hilatsaka ho filoha
Na mihevitra hanongam-panjakana
Fa miresaka fotsiny izay tsy soa
Sy mihoatra fefy tsy ara-dalàna

Izaho akory tsy hanao propagandy
Na hanohana an’izatsy sy izaroa
Na hanao pinochio hitantara vandy
Na hanao hoe izaho no favy sy mahavoa

Izaho akory tsy hanao politika
Na hanangana antoko vaovao
Fa milaza mahitsy ireo fikafika
Sy tsy nety natao hatramin’izao

Izaho akory tsy hanohitra fahatany
Na mba te halaza sy te ho re
Fa manokatra masonao fotsiny ihany
Mba ho tonga saina ny be dia be

Izaho akory tsy anatina antoko
Na hitady seza dia mody miady
Fa miezaka fotsiny hampiova loko
Ilay firenena efa any an-kady

Izaho akory tsy misy olona tohanana
Na ireo taloha , na ireo vaovao
Ka aza asiana sakana io na bahana
Fa aleo aloha dia tsoriko aminao
--------