VALY - raozigasy

Azo vakiana?

Hanoratako ialahy ry valy
Na dia haiko tsy hahavaly
An-tononkalo izay soratako
Fa am-pomba hafa efa fantako

Fa efa tsapako sy hitako
F’ireo adidy tsy tafitako
Andraikitro izaho ilay zoky
Ialahy teo nanome ny toky

Fa efa haiko sy voadiniko
Ireo tokony ho : dinidiniko
Ireo asako izaho lahimatoa
Tena vitan’ialahy tokoa

Fa fantatro ary koa ekeko
An-tsitrapo tsy notereko
Ary tena tam-pitiavana
No nanampian’ialahy ny havana

Koa amin’izao anio izao
Tsy somonga na lalao
No isaorako an’ialahy
Tsy valy ialahy fa rahalahy

Tsy sanatria hoe fety androany
Ny tsingerin-taona eo ihany
Fa eto aho no manararaotra
Hiarahaba ary koa hisaotra

Misaotra an’ialahy misolo
Ny fianakaviako manontolo
Satria ialahy izao dia solon-dray
No mbola zoky aminay

Misaotra an’ialahy mijoro
Ho vatolampy tsy hikoro
Tena Andry iankinana tokoa
Mendrika homena valisoa

Dia hosalama hatrany ialahy
Ry rahalahy, ry zaodahy
Dia hitombo koa ny fahendrena
Dia hanaraka an’ialahy ny harena

Andriamanitra hitahy
Izay rehetra kasain’ialahy
Dia mahereza, mahombiaza
Izay no vetso mba voalaza

Hevitra mandeha

pissoa (11/04/2006 20:41:11)

Mahafinaritra izy izany, na ny tononkalo ny ilay zao-dahy!

raozigasy (28/04/2006 22:57:21)

Misaotra anao Pissoa, izaho indray aloha dia tsy manaiky ilay hoe zao-dahy tsy mba namana e !

Hametraka hevitra

Midira aloha

Mombamomba

Mpanoratra : raozigasy

Nampiditra : raozigasy
Daty : 09/04/2006
Mpamangy : 1713
Mankafy : 1

Tononkalo hafa

Orohy aho akia malala a
Tratry ny taona 2020 Ho
Gaigy be
01 Novambra 2019
Ry zalahy sy ny sasany
Natahotra
Peratra
Un jour mon fils tu vas m
Fan Zone
Ialahy