VAVAKO (raozigasy)

VAVAKO

Latsaka an-katerena
Ianao ry firenena
Izany ve dia azo ekena ?

Latsaka ao anaty lavaka
Ianao ry nosy ka voaavaka
Ka dia entiko am-bavaka

Ka ny hatako amin-dRay
Irina Izy hampiray
Ny Malagasy tsirairay

Ka ny Tanany mahery
No hambomba sy hijery
Ity fireneko tsy ho very

Ka Izy Tompo anie hitahy
Hiaro ary koa hiahy
Ity fanjakana izay mivaha

Ka ny sitrapony hanjaka
Sy hibahana ny laka
Ka ilay firenena hitraka

Ka ho feno filaminana
Tsy hisy izay hoe hifaninana
Fa hisy rindram-pandaminana

Dia izay re no mba vavaka
Tiako asandratra hiavaka
Ho an’i Dago izay an-davaka

Fa latsaka an-katerena
Ilay fiainam-pirenena
Ka tena tsy azoko ekena
--------