Iny tsikiny iny (Herizo Ravonjison Andrianitsiahy)

Iny tsikiny iny raha misoritra eny
Dia fitaovana ampiasainy hanafenana irony
Alahelo mitambesatra anaty fa satriny tsy hiteny
Fa sitraniny mangina ao anaty saina tony.

Iny tsikiny iny raha jerena tsy misy tsiny
Na lazaina fa fiainana milamina
Fa fanafody iny izay heveriny
Hampitony maika ireo ratra sarotra tazanina

Iny tsikiny iny mety mora alaina tahaka
Saintsainina malemy fa mifono fananarana
Sy manafina ireo hetaheta tononona am-bavaka
Tsy tonga eny am-bava fa miandry fandaharana

Iny tsikiny iny tsy omby sy tsy afenina
Heveriny hafaliana sy hitondra hery
Satria raha misy teny maro tiany ho tenenina
Tsy ho zakan'iza henoina ka koboniny ho azy irery

Ka iny fotsiny ihany andramana zaraina
Manoloana ireo ady maro mifanesy
Mba tsy handaniana fotoana hitaraina
Rehefa misy ady mafy nefa te handresy.


Herizo Andrianitsiahy, Antananarivo, 21 martsa 2025, 20:43
--------