VOASARIKA - Herizo ANDRIANITSIAHY RAVONJISON

Nisy olona sendra nandalo.
Fa nanaitra ny saiko variana.
Ka nanery ny vavako hikalo,
Hirahira mahita olon-tiana.

Ry anatin`ny foko: mitsora!
Mandefasa ny saina makany!
Toa tsotsofon`ny rivotra mora,
Dia indro fa lasa vinany.

Dontodonto ny saiko manakatra,
Mitsiky ho azy ny molotro roa.
Fa vangian`ny fitia tena matotra.
Ka mamorona tontolo hafa voa.

Dia tontolon`ny nofy mitafa,
Mpamelona ireo sary tsy misy.
Izay mivadika ho sento hafahafa,
Ka nefa dia ankafiziko mihitsy.

Ao no foroniko izaho samy irery,
Ny tantara mba tiana hitranga.
Izay tsy ho voasetran`ny akora miery,
Ka entiko am-bavaka ho tonga.

Dia ankehitriny tsy voatanako intsony,
Ka voatery ny vavako hizaka.
Sy hamoaka ireo tsy mampitony,
Sy ny mavesatra an-tsaina tsy zaka.

Hoe voadona ny foko ka miontsana,
Maniditsidina izy ao mitady.
Fa misy any tiany hanorenana,
Ny tena fitia sy voady.

Ho tsanganana iray voajoro.
Fa olona roa no mitambatra!
Ho mpanangana raha misy mikoro.
Hanorina hoavy mahasambatra...

- Herizo RAVONJISON ANDRIANITSIAHY, Toamasina 14 aprily 2020

Hametraka hevitra

Midira aloha

Mombamomba

Mpanoratra : Herizo ANDRIANITSIAHY RAVONJISON

Nampiditra : zonytsiahy
Daty : 27/06/2020
Mpamangy : 100
Mankafy : 0

Tononkalo hafa

Ity ny teniko
Misy reny tsy miteny
Diso tety
Hiran'ny tsy manantena
Hiran`ny fahatanorana
Havadika ny pejy
Ny voan'ny nofinofy
Paska minitra,
Kapoakan'i Jesosy
Rahafaliana